Iyadoo uu dalka Jaban ka socdo shirka caalamiga ah ee Tokiyo international conference oo ay isugu yimaadeen madax badan oo kala kala socota daafaha dunida, ayaa waxay labada wadan, kenya iyo Japan isla meel dhigeen in ay si wadajir ah isaga kaashan doonaan sidii loo horumarin lahaa waaxda caafimaadka ee labada dal, iyadoo la gaadhsiinayo heer isku filaansho ah oo awood leh, iyadoo arrintani ay ahayd mid ay labada dal mudo dheer ku wada haminayeen.
Wasiirka wasaarada Caafimaadka ee dalka Kenya Mudane Adan Bare Ducaale oo kulan gaar ah la qaatay dhigiisa dalka Japan Minoru kiuchi, ayaa isla meel dhigay sidii labadan wadan ay isaga kaashan lahaayeen dhanka caafimaadka. Talaabadan ayaa ah mid kamid ah, talaabooyinka ay dowlada Kenya iskaashiga kula samaynayso wasaarada caafimaadka ee dalalka Asia. Wasiir ducaale ayaa dhankiisa dowlada Japan uga mahad celiyay dadaaladan, isagoo sheegay in arrinka iskaashiga dhanka caafimaadku noqon doono mid wax ku ool ah, bulshada labada wadana faa’iido badan u yeelan doona.
Wasiir ducaale oo hada ah wasiirka caafimaadka dalka Kenya, ayaa si wayn isha loogu hayaa sida uu wax uga badali doono waaxda caafimaadka dalka, iyadoo hadii uu si wanaagsan ugu hagar boxo, isla markaasna uu hirgaliyo nidaam caafimaad oo hufan oo shacabka u adeega uu ku mutaysan karo abaal marin mustaqbalka uu kaga qormi doono baal dahab ah.
Isbataalka dalka Kenya ugu wayn ee Kenyatta National Hospital ayaa wakhtigan ah mid u baahan balaadhin, iyadoo qaybta gargaarka deg dega ah loogu fidiyo bukaanku ay noqoay goob buux dhaafta isla markaasna aan ku filayn in ay si deg deg ah u qaabisho dhibaneyaasha caafimaad sida joogtada ah u soo gaadhay halkaasi, iyadoo inta badan isbataalada dalku yihiin kuwa mashquul ah .
Jigjiganews,com
info@jigjiganews.com
