Furitaanka Biyo xidheenka wayn ee itoobiya…Faalo kooban.
Waxaa maanta oo ah sagaalka bisha sagaalaad 2025 si rasmi ah loo furay biyo xidheenka wayn ee dalka Itoobiya kaas oo mudo sanado badan ah soo socday.
Biyo xidheenkan oo wakhtiyo kala duwan muran la xidhiidha wadaaga biyuhu ka dhashay ayaa haatan gabi ahaanba dhamaaday, isla markaasna buuxsamay iyadoo biyihii wabigu ay hada wixii ka dambeeya si caadi ah ugu socon doonaan dalalka kale ee wabigu uu maro, Ra’iisulwasaare Abiy oo hadal kooban ka jeediyay furitaanka biyo xidheenkan ayaa sheegay in qorshaha itoobiya uuna marnaba ahayn in ay wax u dhimaan dalalka kale ee wabigu maro balse ay kaliya soo kordhiyeen biyo xidheen dalalka gobolka oo dhan anfici doona isla markaasna faa’iido u leh dhaqaalaha gobolka.
Furitaanka biyo xidheenkan ayaa waxaa ka soo qayb galay madaxwayneyaal iyo masuulyihiin kale oo qaarada Africa xilal ka haya sida Igad iyo midowga Africa.
Maxaad ka ogtahay Arrinta cajiibka ah ee soo muuqatay wakhtigii xaflada biyo xidheenka.
Itoobiya qarniyadii hore masuuliyiinta dalka maamushaa xilka kama dagi jirin, si nabad ahna uma wareejin jirin, balse doorkan waxaa si rasmi ah goobta xaflada uga soo muuqda Ra’iiuslwasaarihii hore ee itoobiya Hailemarium iyo Midka hada xilka haya Abiy, taas oo si dhab ah u muujinaysa in itoobiya ay gaadhay heer wanaagsan oo bilow ah marka la eego dhanka dimuqraadiyada iyo xilka oo si nabad ah la isugu wareejiyo, taas oo aan hada ka hor dhicin ama sahlaynaan jirin. Arrintan oo ah arrin cajiib ah isla markaasna ah bilow wanaagsan marka la eego dunida iyo dimuqraadiyada ayaa laga dhex dheehanayay xaflada.
Guud ahaan reer itoobiya ayuu arrinkani u yahay guul taariikhi ah oo sanado badan la sugayay, waxaana la rajaynayaa in malaayiin qof oo muwaadiniin ahi ay ka faa’iidaysani doonaan mashruucan baaxada leh oo noqonaya midka Africa ugu wayn halka caalamka oo dhan uu noqonayo mashruucii todobaad ee noociisa ah ee ugu wayn.
Nagala soo xidhiidh: info@jigjiganews.com
